چلتر عورت اور بیبا مرد

ایشائی کلچر میں اگر مرد عورت پہ تشدد کرے تو ایک اچھی عورت پہ لازم ہے کہ وہ اسے نہ صرف چھپائے بلکہ دنیا کے سامنے ہنس ہنس کر یہ بھی ظاہر کرے کہ وہ دونوں کس قدر آئیڈیل کپل ہیں چاہے غازے کی تہہ میں اس تھپڑ کا نشان ہی کیوں نہ ہو جو کچھ ہی دیر پہلے صاحب نے منہ پہ رسید کیا ہو۔

اور دل چسپ بات یہ ہے کہ اس امید کا اطلاق پڑھی لکھی عورت پہ زیادہ ہوتا ہے کیونکہ وہ تو سمجھ دار ہے نا، ذہین، پڑھی لکھی نے معصوم دکھتے صاحب کو کیوں اتنا فرسٹریٹ کیا کہ وہ تھپڑ لگانے پہ مجبور ہو گئے۔۔ یہ تو جاہل عورتوں والا کام ہوا نا۔

تشدد کی پاور ڈائنامکس میں مدعا عورت پہ ڈالنے کی روایت اس قدر مضبوط ہے کہ اس کے سامنے انتہائی مضبوط عورت بھی ہتھیار ڈال دیتی ہے چاہے ماں باپ کتنا ہی کہیں کہ ہم تمہارے ساتھ ہیں۔۔ چھوڑ دو اسے۔

مگر معاشرے کی نادیدہ زنجیریں توڑنا آسان کام نہیں۔ تبھی تو سارہ انعام مرنے سے پہلے کچھ بتا ہی نہیں سکی کہ شوہر نشے اور غصے میں کیا حشر بپا کرتا ہے اور پنڈی میں پروفیسر کی بیوی حنا جس نے گلے میں پھندا ڈلوا لیا مگر اردگرد والوں کو خبر نہیں ہونے دی کہ شوہر صاحب اپنی جھنجھلاہٹ کا نشانہ کیسے بنا رہے تھے؟

یاد رکھیں مرد اور عورت کے بیچ تشدد کا کھیل پہلی بار میں ہی گلا دبانے اور موت تک نہیں پہنچ جاتا، یہ ڈرامہ ہلکی پھلکی مارپیٹ سے شروع ہو کر انجام کی طرف بڑھتا ہے،........

© Daily Urdu