Creat: 04.04.2026 | 05:38

Actualitzat: 04.04.2026 | 05:38

S’a acabat eth trimèstre tamb fòrça tarrambòri per part deth professorat, i a agut convocatòries de grèva e mobilizacions un parelh de dies e semble que non arriben a bon pòrt es demanes hètes. Era nauta ratio escolan-professor, manca de recorsi, non se i assignen es dinèrs de besonh per part des govèrns, freqüents cambis legislatius, subercarga burocratica, manca de professorat en bèri cassi, dificultats ena atencion ara diuersitat, i a fòrça complexitat enes aules e sense desbrembar es mi-lhores salariaus qu’an d’anar acompanhades dera milhora des condicions de trabalh, era paraula “congelats” se repetís massa a long des ans, aguesti son entre d’auti es motius qu’an amiat ara situacion. Cau reflexionar sus qué passe ena escòla?

S’an invertit fòrça sòs en ua digitalizacion enes escòles e qu’ara s’a demostrat que non ei avienta. I a dues abilitats que son primordiaus, eth liéger e er escríuer tamb fluïditat tà poder auançar, eth sistèma a hèt un shinhau de manja ampla e ara gessen es problèmes, qu’en bèri cassi, ja dificils de solucionar. Cada nau politic qu’a arribat en govèrn, a volut implantar era sua, per aquerò portam un pialèr de leis que van cambiant tot soent, causa qu’a influït ena qualitat dera educacion provocant mès ben ua devarada. Tot amassa genère ua desmotivacion per part deth professorat.

Era major preocupacion des pairs ei eth desvolopament des mainatges en sòn rendement escolar, mès i a agut ua baishada ena exigéncia academica, enes aules es nivèus d’aprofitament sòn plan diferents. Aguesta mainadèra son lo mès predat tà un país, son eth futur, e eth sòn professorat son ua des pèces clau, apuem-les e cuedem-les!!!

© Segre