Debatten vert for enkel

Lærarnorma er viktig, men ho er nettopp ei norm – eit gjennomsnittsmål for ressursbruk, skriv Ingrid Duesund Fjeldsbø i dette innlegget.

Du les no ein meiningsartikkel. Han uttrykker skribenten si meining.

Kva vil du bidra med? Send inn her! (max 3000 teikn)

Dette er eit svar til Torgeir Arne Lid sitt innlegg som du kan lese her.

Lesarbrev: Når det gjeld skulen, handlar det om noko av det viktigaste me har – barna våre. Me ynskjer alle det beste for elevane i Alver.

Samtidig meiner me i Høgre at debatten vert for enkel når den vert framstilt som eit val mellom kvalitet og «budsjettknep».

Realiteten er at me må ta ansvar for begge delar. Skal me sikra eit godt skuletilbod over tid, må me også forvalta ressursane på ein berekraftig måte.

Lærarnorma er viktig, men ho er nettopp ei norm – eit gjennomsnittsmål for ressursbruk. Ho seier ikkje åleine noko om kvaliteten i undervisninga eller korleis ressursane bør fordelast best mellom skular med ulike behov.

Høgre meiner difor det er fornuftig å vurdera norm på kommunenivå, slik at ein kan bruka ressursane meir målretta der behova er størst.

Det er ikkje slik at lokal styring automatisk betyr dårlegare tilbod. Det kan heller gje mogelegheit til å styrkje skular som treng det mest, anten det handlar om elevar med særskilde behov, utfordringar med rekruttering eller læringsmiljø.

Ei ordning på skulenivå kan i nokre tilfelle hindra dette.

Dette handlar ikkje om å undervurdere verken lærarar eller elevar. Det handlar om å sikra eit godt og likeverdig tilbod framover.

Me er nok einige om målet. Så får me ha ein open og ærleg diskusjon om kva verkemiddel som er best.

Ingrid Duesund Fjeldsbø

Gruppeleiar Alver Høgre

Fleirtal for lærarnorm på skulenivå, men med bismak

Kva vil du bidra med? Send inn her! (max 3000 teikn)

© Strilen