Distriktskulane i Nordhordland må få leve

Så er du endeleg 16 år og skal velja kva retning du skal ta i vidaregåande opplæring. Dette er eit val som kan følgja deg resten av livet. Høyrest det massivt ut? Det er det.

Lene Lundervold Storheim

Du les no ein meiningsartikkel. Han uttrykker skribenten si meining.

Kva vil du bidra med? Send inn her! (max 3000 teikn)

Lesarbrev: Du ønskjer å gå saman med jamaldra, men det er vanskeleg å velja. Du landar på at det er viktig å få bu heime, slik at du kan halda god kontakt med venene dine, og vel derfor studiespesialisering på nærskulen din.

Etter at du har søkt, les du i avisa at linja du har valt, er foreslått lagd ned, og du må brått byrja å tenkja på nytt. Kva skule vel du no? Når skal du skaffa deg hybel? Klarer du å halda fram med fritidsaktivitetane dine? Dette blir verkelegheita til hausten.

Så er du snart 17 år. Du var heldig og kom inn på studiespesialisering på nærskulen din og har snart fullført Vg1.

Det har vore tøft, og du har ikkje fått dei beste karakterane, men du har gjort ditt beste og lærarane dine følgjer deg opp. Rett før eksamen kjem meldinga om at tre klassar skal bli til to, og du skjønar at dette gjeld deg. Så var det likevel ikkje godt nok å gjera sitt beste.

Du byrjar å grua deg til hausten – kvar skal du gå på skule no? Kjem du til å trivast i ein ny klasse? Klarer lærarar som ikkje kjenner deg å følgja deg opp?

Du får lang reiseveg, og tryggleiken i nærskulen forsvinn. Dagane blir fort etne opp av reisetid.

Reagerer på klassekutt: – Det er oss det går utover

Dette er heilt reelle tilfelle som lærarar i distriktet no må hjelpa elevane med. Midt i innspurten av grunnskulen eller Vg1 kjem usikkerheita og spenner bein under ungdommen vår.

Det er mindre enn to år sidan sist vi kjempa mot nedlegging av klassar. Vi trudde vi hadde vunne fram med argumenta våre om distriktsskulen. Når meldinga no kjem heilt på tampen av skuleåret kjennast det ekstra ille.

Må dei ungdommane som ikkje får den skuleplassen dei trudde var sikker pendle i timevis til ein ny og ukjend skule eller må di flytte frå familien?

Både Knarvik og Austrheim VGS er kombinerte skular med yrkesfag og studieførebuande klasser. Dette skaper eit godt og mangfaldig miljø.

Dei to skulane ønskjer å samarbeide vidare for å gje elevane eit best mogeleg tilbod, ikkje å verte sett opp mot kvarandre.

Om ungdommane må reise vekk på skule allereie som tenåringar, er det mindre sannsynleg at dei kjem attende og etablerer seg i heimdistriktet. Då vil desse utkantkommunane ikkje berre mangle arbeidskraft, men også stå i fare for å verte heilt fråflytta.

Torar mot varsla skule­kutt: – Styrt avvikling

Endå viktigare er det kan hende at ein 16 åring ikkje bør bu åleine. Mange i denne alderen treng endå nokon som får dei opp om morgonen, syt for at dei et skikkeleg, og at dei kjem seg i seng i rimeleg tid.

Dette er blitt ekstra viktig no når spel og kommunikasjon på nett lett kan ta nattesøvnen frå dei om ingen passar på.

Mange treng også den tryggleiken på heimstaden sin. Der har dei nokon å snakke med når livet buttar. Om ein går for mykje åleine er det fort gjort å droppa ut.

Det har store kostnader ikkje bere for den enkelte, men for heile samfunnet. Dette blir realiteten for ungdom som blir utrygge i nye miljø og som ikkje får den oppfølginga dei kan få på sin nærskule der vener og lærarar kjennar dei godt.

Endringsforslaga til dei to skulane er noko ulike, men begge gjeld klassar på studieførebuande. For begge skulane vil det skape problem for elevane.

Når elevar som neste år skal søkje på Knarvik, veit at det ikkje er sikkert at dei får gå der i tre år og når elevar lengre ute i distriktet veit at det er usikkert om det finst studieførebuande på Austrheim vgs., vil dei sikre seg gjennom å søkje andre stader.

Vi håper at politikarane ser kor viktig det er at dei to vidaregåande skulane i Nordhordland har eit godt og breitt studietilbod slik at vår ungdom får dei same mogelegheitene som byungdommen.

Lene Lundervold Storheim og Renée Semmingsen, tillitsvalde for UDF Knarvik vgs. og UDF Austrheim vgs.

Kva vil du bidra med? Send inn her! (max 3000 teikn)

Kva er det eigentleg administrasjonen i fylket har som agenda?

Torar mot varsla skule­kutt: – Styrt avvikling

Reagerer på klassekutt: – Det er oss det går utover

© Strilen