Por suposto que hai que regular as redes. Por suposto que hai que prohibirlles o acceso aos menores. Cando naceron as redes dixéronnos que era para «democratizar o coñecemento». Co paso dos anos temos claro que o único que se democratizou foi o insulto.

Antes, para ter voz pública, tiñas que ter demostrada unha certa valía. Tiñas que ter, por exemplo, escrito e publicado algo, ocupar un cargo máis ou menos relevante, ter feita unha carreira docente (case escribo decente). Algo así. Como moito, se tiñas algo interesante que dicir, podías chamar a un programa de radio e intervir, ou escribir unha carta ao director que o xornal valoraría se tiña sentido ou non publicar. Agora, todo é moito máis doado e, na potaxe intragable das redes sociais, comparte a súa opinión o catedrático de Metafísica co desinformado obsesionado coas conspiranoias, o nacho aburrido co experto na materia. A democratización da opinión puxo en pé de igualdade a todo o mundo cando, vanme vostedes perdoar por ser tan impopular o que vou dicir, non todos somos iguais segundo para que cousas. Repito: nas redes conviven o experto astrónomo co terraplanista militante, o médico experto cos antivacinas, aquela que leva toda a vida estudando con quen só se informa en pseudomedios fabricadores de loiadas. A igualdade fai que de súpeto calquera poida soltarlle un improperio a quen lle pete e reinvindicar iso de «é que é a miña opinión». E non (vou ser impopular outra vez), non todas as opinións valen. Non todas as opinións son tolerables. Ser un machista e escribilo nas redes non é tolerable. Ser fascista e escribilo nas redes non é tolerable. Ser negacionista da ciencia e escribilo nas redes non é tolerable. Non todas as opinións valen, e algunhas están tipificadas, de feito, como delito.

Por iso, tentar controlalas, como algúns levamos pedindo dende hai moitísimos anos, é de puro sentido común. Non aceptariamos que na porta do colexio dos nosos fillos se puxese alguén a berrar que as mulleres son inferiores e deben quedar na casa atendendo os maridos. Non tolerariamos que no bus entrase alguén a pedir a morte dos estranxeiros. Pero, na práctica, iso é o que está pasando. Polas redes e a liberdade entra todo ese lixo. E os nosos fillos e fillas poden velo, asimilalo, crelo, compartilo. E non é desexable. En absoluto o é.

Que aos grandísimos donos das redes sociais X e Telegram o único que se lles ocorreu cando o Goberno anunciou que vai prohibir o acceso ás redes dos menores de dezaseis anos foi un insulto xa o resume todo.

© La Voz de Galicia