Hurbil dugu martxoaren zortzia eta hedabide guztiek argitaratzen dute gizon eta emakumeon arteko berdintasunari buruzko zerbait. Datuak, askotan, inkestetan oinarritutako datuak. Adibidez, gazteen artean jaitsi ... egin dela feminismoarekiko atxikimendua, bereziki gizonengan. Demagun sinetsi egiten ditugula emaitza horiek, agian gure inguru hurbilean sumatzen dugunarekin bat egiten ez badute ere.

Eta halere, hainbeste inkestak seinalatzen duen atzerabidea egia izanda ere, uholdetan paretan ura noraino heldu zen seinalatzen den bezala, mobilizazioak noraino heldu ziren markatzen badugu eta orain non gauden beste marra batekin, ikusiko genuke ura jaitsi egin dela, baina ezin ahaztu ur horiek lurrazpian zeudela duela ez hainbeste denbora. Orduan ez ziren inkestak egiten, baina kosta egiten zitzaizun inguruan zinez berdintasunaren alde zegoen gizonen bat aurkitzea. Bai, indar boteretsuak ari dira feminismoaren kontra, baina feminismo sendo bat dute aurrean, askok nahiko lukeen ahuleziatik urrun.

Egunotan telebista kate bateko aurkezleak esaldi hau bota zuen airera: «zer gertatzen zaizue gizonezkooi?» eta erantzunak tropelean heldu ziren alde guztietatik, gehienak haserreak kutsatutakoak. Nonbait, feminismoa ez zaio gizon askori eroso egiten, baina ezta emakumeoi ere. Guk ere pentsaera eta jokaera asko aldatu behar izan dugu, sarritan ikasitakoa desikasi behar izan dugu, hondarrezko gazteluak erori zaizkigu gainera, ez digu inork ezer oparitu.

Ai ene, hain sentibera, hain azal fineko dira gizonezkoak, hain arriskuan ikusten dute 'betiko' nagusitasuna? Zer egin dugu gaizki feminismotik, duela urte gutxiko apar hura ezabatzeko? Zeini interesatzen zaio etsipena zabaltzea? Eta galdera hauen ondoren egunkari osoa beteko luketen galdera amaigabeak. Ez da seinale txarra. Duela hamarraldi batzuk inor gutxiri interesatzen zitzaion berdintasunaren kontua eta orain, antza, edonork du aldarri horri buruzko iritzia, alde nahiz kontra.

Erosotasuna, ordea, gainbalioetsia dago, helburu nagusi bilakatu zaigu. Edonork, edozein egoeratan, galdetzen dizu eroso ote zauden. Ez, ez da eroso korrontearen kontra igeri egitea, ibaitik gora, ez da eroso hainbat lema borobilen azpitik dagoen gezurra salatzea, ez da eroso behin eta berriz errepikatu behar izatea berdintasunean aurrera egitea guztiontzat dela onuragarri, gizon nahiz emakume.

Dena prest martxoaren zortzirako.

Límite de sesiones alcanzadas

El acceso al contenido Premium está abierto por cortesía del establecimiento donde te encuentras, pero ahora mismo hay demasiados usuarios conectados a las vez.

Por favor, inténtalo pasados unos minutos.

Al iniciar sesión desde un dispositivo distinto, por seguridad, se cerró la última sesión en este.

Para continuar disfrutando de su suscripción digital, inicie sesión en este dispositivo.

¿Tienes una suscripción? Inicia sesión

© El Diario Vasco