Det er med stor sorg, men også med glede vi minnest Torbjørg Sandvik, som døde den 12.februar.

Vi vart kolleger med Torbjørg da ho vart tilsett på Liene skule i 1981. Ho vart fort ein god og kjær kollega med mye kunnskap og erfaring. Ho var lett å få kontakt med og bli trygg på, og det vart mye tett samarbeid om klasser, enkeltelevar og også som mødre.

Alle hadde vi ei spesiell interesse for leseopplæring, og vi gledde oss saman da elevane etter kvart løyste lesekoda.

Torbjørg var ein god forteljar, og vi trur ho koste seg da ho underviste om bygda, om dagleglivet i gamle dagar, om naturen og det som voks over og i jorda. Ho var flink til å engasjere ungane, og vi kan sjå for oss Torbjørg og elevane sit i ring og tryllar fram smør ved å riste fløyte i eit Norgesglas. Likeeins fekk ho tak i råmjølk frå kyr som nyleg hadde kalva og kokte kalvedans saman med elevane.

Torbjørg var pliktoppfyllande og arbeidssam. Ho hadde god oversikt og hadde god kontroll på ein positiv måte. Ho var alltid der, og var lett å spørja til råds. Det at ho berre var borte ein dag på Liene på grunn av sjukdom, seier noko om god helse, men også om sterk vilje og ansvarskjensle for arbeidet sitt

I tillegg til å vera ein god kollega, var Torbjørg ein god venn. Ho var gjestfri, og ho hadde ein eigen evne til å skape hygge rundt seg. Ho viste omsorg for alle.

Torbjørg fekk 26 år som pensjonist, dei fleste saman med Gunnar som døde i 2022. Det var eit hardt slag for henne da han vart borte. Ho var veldig sosial og likte seg ikkje så godt åleine, men ho var flink til å koma seg ut sjølv. Dessutan hadde ho familie og venner som ho var saman med på aktivitetar og tilstellingar.

Heilt sidan ho flytta attende til heimbygda i 1981, har ho vore engasjert i foreiningsliv og i mye anna som har gått føre seg i kommunen. Ho har vore med på organisering og gjennomføring av uttallige arrangement, og det er ikkje få fat med vaflar, kaker og påsmurde rundstykke og snitter ho har bidrege med.

Torbjørg var oppteken av å halde seg i form, og i sitt 89. år deltok ho både på bassengtrening på Harpefoss og Sterk og Stødig på Hjertebanken i tillegg til å gå turar i nærområdet.

Dei siste par vekene var travle for Torbjørg. Ho var med på Senioruniversitetet den 3. februar, og etter det Torsdagstreff på Øvertun, på Abbakonsert med skulemusikken, på møte med sanitetsgruppa si og på foredrag på biblioteket utanom treningane.

Vi har hatt veldig mange år saman med Torbjørg i Sør Fron bygdekvinnelag. Der har ho lagt ned ein stor og god innsats. Ikkje minst har ho med godt humør og smil vore med og skapt god stemning og trivsel på møta.

Det er vemodig og heilt utruleg å tenkje på at den dagen ho døde ordna ho til møte i bygdekvinnelaget. Aktiv og engasjert til det siste!

Vi er takksame for alt Torbjørg gjorde for mange.

Snill og omgjengeleg, gjestfri, raus og alltid på tilbodssida.

Slik vil vi hugse Torbjørg!

© Dølen